[新聞] 文化部鼓勵台語表演 今年有79團申請著補助

公視新聞網 https://news.pts.org.tw/article/692135 文化部鼓勵台語表演 今年有79團申請著補助 發布時間：2024-04-25 19:15 更新時間：2024-04-26 08:27 https://www.youtube.com/watch?v=aSmvU7JJb14 文化部對舊年開始推出「鼓勵表演藝術台語主流化計畫」，希望鼓勵愈來愈濟表演藝術的 團隊用台語創作，今年攏總有118个團體申請，尾仔有79个團體通過。評審嘛表示，今年 有真濟囡仔劇團來申請，欲為囡仔做台語戲齣，這就是這个補助計畫，想欲鼓勵的代誌。 台頂當咧搬的是台語版「武松打虎」，是舊年得著文化部補助的台語表演。文化部為著推 sak台語主流化，有推出補助計畫，鼓勵表演藝術用母語來演出。今年總共118个團體報名 ，上尾有79个表演藝術團體通過補助，補助的總金額有5204萬。長期注心佇台語戲齣的阮 劇團、提著500萬補助，in想欲做的是利用戲劇向下沿推廣台語，望用青少年有興趣的題 材，予囡仔輩感覺台語毋是一件遐嚴肅的代誌。 阮劇團團長，蔡明純表示：「阮較早咧做愛情的故事，尤其是咱台語的部份，攏較悲劇。 阮想欲共這，會使做較輕巧、做較喜劇。透過這个故事，透過這个劇情，透過阮演員的搬 演，伊嘛是會感覺講，這無遮爾仔困難。」 擔任評審的林茂賢老師表示，今年有真濟囡仔劇團來申請，其中有一寡原本攏用華語咧演 出，這馬共仝一个戲齣改做台語版，這就是補助計畫想欲鼓勵的代誌。 臺中教育大學台語系副教授，林茂賢表示：「我印象較深的，有真濟囡仔劇團，譬論講， 像彼个紙風車，伊本來是攏用華語來演出，這馬共改做台語版，按呢對推展台語較有幫助 。」 評審林茂賢表示，雖罔佇補助計畫的鼓勵之下，台語表演有愈來愈多元的現象，毋過目前 猶是以戲劇較濟，望以後親像答喙鼓、音樂會、演唱、電影等等，逐家攏通用台語來表演 。伊也認為，多元的類型才有法度予台語的推展閣較全面性，未來若通行去到國際的舞台 ，對咱臺灣文化的推展是誠有幫助。 記者 劉芯瑀 林郁凱 臺北報導 陳怡臻/編輯 -- ※ 發信站: 批踢踢實業坊(ptt.cc), 來自: 111.255.121.223 (臺灣) ※ 文章網址: https://www.ptt.cc/bbs/Gossiping/M.1714112776.A.9EB.html