[新聞] 圖書館「臺語講古」7成講華語？ 母語家庭真失望

公視新聞網 https://news.pts.org.tw/article/690641 圖書館「臺語講古」7成講華語？ 母語家庭真失望 發布時間：2024-04-16 19:15 更新時間：2024-04-17 08:36 呂尚儒 莊浚佑 / 台北報導 https://www.youtube.com/watch?v=IxIxV_coVSg 文化部當咧推廣台語主流化，有真濟戲齣、活動用台語，毋過最近有家長佇面冊講，in tshuā囡仔去圖書館參加台語活動，煞發現有七成攏講華語，感覺真失望。有台語團體認 為應該愛加強圖書館的志工講故事的技巧。抑若關注台語議題的民進黨立委陳培瑜是表示 ，未來會提案建議佇各地設示範的圖書館，tshuā頭改善台語活動的品質。（此則新聞標 題、導言、內文皆為臺語文。） 因應文化部鼓勵台語主流化推出濟濟補助，各地開始有愈來愈濟台語的活動，無論是劇場 抑是講故事等等，活動真多元。毋過有家長分享講，最近in囡仔去圖書館，參加台語活動 ，煞干焦佇演出的時講台語，其他的互動對話有七成攏講華語，伊感覺真失望。 民眾 王先生，「介紹遊戲的過程嘛是，大多數用華語來進行，所以一方面我是感覺講真 無彩，我是感覺講in咧教，阿公、阿媽、阿姊、阿兄遮的語詞，抑是講菜市仔買著的菜， 台灣話欲按怎講，對阮(台語)家庭來講，有小可仔較簡單啦。」 這个代誌也佇台語家庭的群組引起討論，一寡台語家庭的家長表示，in佇各地圖書館聽台 語講古，嘛感覺品質真無穩定。台語團體認為講，這應該愛培訓圖書館的志工來加強講故 事的鋩角和台語意識。抑若關注台語議題的民進黨立委陳培瑜，是表示未來會提案建議佇 各地設示範館，互相鼓勵求進步。 台灣台語路協會理事長董力玄，「阮有足濟家長，其實足濟家長會tshuā囡仔去參加英語 的活動，英語的講師嘛用全英語咧tshuā活動，但是下跤囡仔可能嘛聽無，但是英語，譬 如講咱會使用趣味的活動，用互動的方式，予囡仔聽有，知影講彼个老師咧講啥物，台語 嘛仝款。」 民進黨立法委員陳培瑜，「你若有揣著專門的老師，抑是伊有經過一寡訓練佮教育，伊咧 講故事的時陣，伊會使顧著故事的情形，閣會使顧著講，咱欲按怎佮現場的囡仔講母語的 部份，我感覺咱若揣一寡示範館，就是遮的預算咧補助的時陣，人才會感覺講，按呢你文 化部做的代誌才是著的。」 立委陳培瑜嘛強調，政府咧做台語推廣毋是干焦掖錢就好，伊表示這部份伊嘛會繼續加強 監督和檢討。另外，最近一寡台語團體嘛有針對台語的發展和困境，來拜會陳培瑜討論長 期的規畫。伊表示，未來有拍算欲提案修國家語言法的子法，訂出詳細的原則，來解決濟 濟實務上台語推廣的問題。 洪家馨/編輯 -- ※ 發信站: 批踢踢實業坊(ptt.cc), 來自: 111.255.124.98 (臺灣) ※ 文章網址: https://www.ptt.cc/bbs/Gossiping/M.1713351959.A.6B4.html