[新聞] 食檳榔會致癌 消基會呼籲立法管制買賣.標示

公視新聞網 https://news.pts.org.tw/article/667056 食檳榔會致癌 消基會呼籲立法管制買賣.標示 呂尚儒 莊浚佑／臺北報導 發布時間：2023-11-16 19:15 更新時間：2023-11-16 19:38 https://www.youtube.com/watch?v=cGFkw2VrtxY 國際癌症研究總署佇2003年，已經共檳榔列做致癌物，因為本身的檳榔素、檳榔鹼，佇咧 哺的過程，就會產生致癌的成份。消基會抽查檳榔擔，煞發現超過5成的業者，會賣予18 歲者以下的消費者，也呼籲政府趕緊立專法管制，莫予檳榔繼續危害民眾的健康。 根據衛福部2022年的統計，喙空癌佇10大癌症死亡率當中排第六名，其中有8成五以上的 人有哺檳榔的習慣。但是國內針對檳榔的買賣和健康危害標語等等，一直攏無齊全的規定 。消費者文教基金會(消基會)根據抽查全臺灣53間檳榔擔，發現有56.6%的業者賣予疑似 未成年的消費者。 消費者文教基金會董事長吳榮達表示：「連穿學生制服看起來就是學生矣，猶未滿18歲猶 是仝款照賣，這个部份有30間的檳榔擔，是有違規的現象，所以有超過5成的檳榔擔，是 違規、違法賣檳榔，予未滿14歲的遮的青少年。」 消基會指出目前干焦兒少法有規定講，任何人若提供檳榔予18歲以下的人，會當罰1萬以 上10萬箍以下罰金。毋過針對其他的管制措施攏無相關的法令，消基會呼籲為著國民的健 康，政府應該趕緊定專法管理。 消費者文教基金會秘書長陳雅萍表示：「目前咱(政府)針對檳榔的防制的部份，真正是進 度非常慢，甚至是完全無進度，檳榔對健康的危害的部份，無設立一个專法好好仔積極管 理，阮欲呼籲會當佇這部份，會當加強、加速立法的一个跤步。」 衛福部口腔健康副司長顏忠漢表示：「檳榔是一級致癌物，伊無法度用食品來管理，檳榔 防制就是牽涉真濟面向，咱各界的共識猶咧扌焦摵當中。」 消基會建議政府會當共檳榔的管制，增修佇菸害防治法內底，比照薰酒愛有執照才通賣， 抑是另外立檳榔專法，建立完整的管制措施，維護國民健康。 陳玟芯/編輯 -- ※ 發信站: 批踢踢實業坊(ptt.cc), 來自: 111.255.137.31 (臺灣) ※ 文章網址: https://www.ptt.cc/bbs/Gossiping/M.1700148922.A.3C9.html