[新聞] 在地團體推臺語導覽 紹介鹿港早前商業發展

公視新聞網 https://news.pts.org.tw/article/643954 在地團體推臺語導覽 紹介鹿港早前商業發展 楊舒晴／彰化報導 發布時間：2023-06-29 19:15 更新時間：2023-06-29 20:42 https://www.youtube.com/watch?v=ZSMH1rLphrw 鹿港人，講話無相仝。鹿港佇臺灣歷史當中有真重要的地位，鹿港也保留真濟珍貴的建築 佮文化。有在地團體，推出臺語的導覽活動，tshuā民眾行佇巷仔內，聽在地發展的故事 。（此則新聞標題、導言、內文皆為臺語文。） 鹿港有濟濟的老厝，佇古早大部分攏是咧做貿易的，親像這座櫃台就是做生理咧用的，嘛 就是鹿港人咧講的通櫃仔。走出這棟有兩百年歷史的老厝，一路上的建築，攏有故事，這 是鹿港在地團體所推出的暗時導覽活動，tshuā民眾行佇巷仔內，聽在地的發展過程 鹿港茉莉人文環境教育中心導覽員 紀筱榆 一路上就是會看著一寡 猶未修理的厝 抑是講這馬咧修理 修理了後 這馬鹿港的故事 所以阮就希望講 暗時拄好日頭落山 所以較袂遐熱 我家己這馬嘛咧練習用臺語 共逐家tshuā來熟似鹿港按呢 對當年船頭行的倉庫，後車路出發，一路行到臺灣第一个評定古蹟保存區的鹿港老街，最 後來到臺灣唯一一間，由乾隆帝下詔用官銀起的媽祖廟，臺語的導覽體驗，嘛予參加的民 眾感覺誠心適 參加民眾 誠特別 因為我無定定咧講臺語 但是導覽講甲袂bái 參加民眾 用臺語講 OK啊 就是予少年仔加學聽啦 無這馬逐家攏無啥會曉講矣 參加民眾 毋但來遮看看咧 食物件爾 閣會使了解遮的歷史袂bái 主辦單位表示，佇鹿港常民舊厝就有四千外間，有百分之十的空厝率，若無人關心，遮的 舊厝拋荒久來，可能就慢慢仔消失去，in向望透過導覽活動，箍閣較濟人同齊來關心舊厝 的歷史，予在地的故事會當繼續寫落去。 熊楚瑜/編輯 -- ※ 發信站: 批踢踢實業坊(ptt.cc), 來自: 111.255.117.96 (臺灣) ※ 文章網址: https://www.ptt.cc/bbs/Gossiping/M.1688046456.A.88D.html